💁‍♂ गणपती बाप्पा मोरया पुढच्या वर्षी लवकर या म्हणत दीड दिवसाच्या गणपती बाप्पांना भक्तांचा निरोप

आपल्या लाडक्या गणरायाचे आपण दिमाखात स्वागत केले. विधीवत स्थापना केली. 11 दिवस गणेशोत्सवाची धूम असली तरी अनेक घरगुती गणपती मात्र दीड दिवसांचेच असतात.

एक रात्री व दुसऱ्या दिवशी अर्धा दिवस घरात ठेवून त्याची आरती, आवडणारा नैवेद्य करुन अवघ्या दिड दिवसाच्या गणपती बाप्पाचे विसर्जन करण्यात येते. असे करण्यामागे काही प्राचीन परंपरा आहे. त्याबाबत आज जाणून घेऊयात...

अनेकांना वेळ नसतो, मुलं कामाला जाणारी असतात तेव्हा बाप्पांची दहा दिवस काही सेवा करता येत नाही. ही कारणं असली तरी दीड दिवसानं मूर्ती विसर्जन करण्यामागची नेमकी परंपरा काही वेगळीच आहे.

प्रसिद्ध अभ्यासक दा. कृ. सोमण यांनी याबाबत सांगितले आहे. भारत हा कृषीप्रधान देश असल्याने पूर्वी भाद्रपद महिन्यात चतुर्थीच्यादरम्यान धान्याच्या लोंब्या हिरव्यागार पात्यातून डोलू लागतात. यावेळी धरणी मातेविषयी कृतज्ञता व्यक्त करण्यासाठी पूर्वी बांधावरच मातीची मूर्ती तयार करून तिची पूजा केली जायची.

पूजे नंतर त्याचदिवशी या मूर्तीचं नदीत विसर्जन केले जायचे. नंतर या परंपरेत बदल होऊ लागला. अनेकजण सुबक मातीची मूर्ती तयार करून ती घरी आणू लागले. तिची प्राणप्रतिष्ठापना करून नंतर त्या मूर्तीचे विसर्जन करू लागले आणि हळूहळू दीड दिवस गणपती पूजनचा पायंडा पडू लागला. असे असले तरी अनेक ठिकाणी चतुर्थीच्याच दिवशी मूर्तीपूजा करून तिचं विसर्जन करण्याची प्रथा आजही कायम आहे.