तहसीलदार ज्योती देवरे यांच्या बदलीनंतर आ. लंके समर्थकांचा सोशल मीडियावर प्रतिक्रियांचा पाऊस !

पारनेर : पारनेरच्या तहसीलदार ज्योती देवरे यांची तडकाफडकी बदली करण्यात आली असून लोकसेवक पदाचा गैरवापर केल्याचा आरोप असलेल्या पारनेरच्या तहसीलदार ज्योती देवरे या चौकशीत दोषी ठरल्या असल्याने त्यांची तडकाफडकी बदली करण्यात आली आहे. परंतु तहसीलदार ज्योती देवरे यांनी त्यांच्या वरील सर्व आरोप फेटाळून लावले आहेत. पदाचा गैरवापर करून वाळूमाफियांना परस्पर कारवाईमुक्त करणे, बेकायदेशीर वाळू उपसा करणाऱ्यांचे ट्रॅक्टर, डंपर, जेसीबी आणि पोकलेन मशिन जप्त केल्यानंतर तडजोड शुल्क सरकारला जमा न करता परस्पर मुक्त करणे असे विविध आरोप तहसीलदार ज्योती देवरे यांच्यावर आहेत. अशा विविध प्रकारे ज्योती देवरे यांनी ५ कोटी ९४ लाख ९६ हजार ७२ रुपयांचा भ्रष्टाचार केल्याची तक्रार राज्याच्या लोकायुक्तांकडे ३० ऑगस्ट रोजी दाखल करण्यात आली होती.

यासंदर्भात आलेल्या शासनाच्या आदेशात म्हटलंय की, पारनेरच्या तहसीलदार ज्योती देवरे यांनी राज्य महिला आयोग, नाशिकचे विभागीय आयुक्त यांच्याकडे तक्रार दाखल केली होती. या तक्रारीनुसार या प्रकरणाच्या चौकशीचे निर्देश विभागीय आयुक्तांनी अहमदनगरच्या जिल्हाधिकाऱ्यांना दिले होते. यानंतर जिल्हाधिकाऱ्यांनी तीन महिला अधिकाऱ्यांची चौकशी समिती नेमली होती. या समितीने ज्योती देवरे यांच्या भ्रष्टाचार प्रकरणाची चौकशी करुन त्याचा अहवाल सादर केला आहे. या अहवालात ज्योती देवरे यांच्या तक्रारीत कोणतही तथ्य नसल्याचं म्हटलं आहे. तसेच ज्योती देवरे यांनी कामात गंभीर स्वरुपाची अनियमितता केली असून अधिकार क्षेत्राबाहेर जाऊन पदाचा दुरुपयोग केल्याने त्यांच्यावर कारवाई करण्याची शिफारस करण्यात आली होती. चौकशीदरम्यान देवरे यांनी माध्यमांमध्ये भाष्य करुन शासनाची प्रतिमा मलिन केल्याचा आरोपही त्यांच्यावर करण्यात आला आहे.

दरम्यान, कर्तव्यात कसूर केल्याच्या कारणाने त्यांची बदली करण्यात आली असून जळगाव जिल्ह्यातील संगायो येथील नामदेव पाटील यांच्या प्रस्थावीत रिक्त होणाऱ्या जागेवर देवरे यांची तहसीलदारपदी नियुक्ती करण्यात आली आहे. तात्काळ प्रभावाने त्यांची बदली करण्यात आली असून नियुक्तीच्या ठिकाणीही त्यांना तातडीने हजर राहण्याचे आदेश देण्यात आले आहेत. तसेच शासनाच्या पूर्वपरवानगीशिवाय त्यांना कुठल्याही प्रकारची रजा मंजूर न करण्याचे निर्देशही देण्यात आले आहेत.

तहसीलदार ज्योती देवरे यांच्या बदली मूळे तालुक्यातील आ.निलेश लंके व तहसीलदार देवरे यांच्यातील वाद मात्र संपुष्टात येणार आहे. परंतु आता तहसीलदार ज्योती देवरे यांच्या बदली नंतर तालुक्यात तहसीलदार म्हणून कोणाची वर्णी लागणार याकडे तालुक्यासह जिह्याचे लक्ष लागले आहे.

तहसीलदारांच्या बदलीच्या आदेशाचा  हा मेसेज सोशल मीडियावर येताच तालुक्यातील आमदार निलेश लंके समर्थकांनी सोशल मीडियावर प्रतिक्रियांचा अक्षरक्ष : पाऊसच पाडला.'अखेर सत्याचाच विजय'...  'निलेश लंकेंचा नाद करणं सोपं नाही'... ' लढाई ही आपल्या हिशोबाने करायची असते'..  'जैसी करणी वैसी भरणी'... 'ओ शेठ तुम्ही नादच केला थेट' अशा विविध पोस्ट सोशल मीडियावर व्हायरल होत आहे.